Machine Head é unha banda estadounidense de heavy metal procedente de Oakland (California).[1][2] A banda foi formada o 12 de outubro de 1991 polo guitarrista e vocalista Robb Flynn, que segue sendo o único membro orixinal do grupo. A musicalidade agresiva de Machine Head converteuna nunha das bandas pioneiras na nova onda do heavy metal estadounidense. A súa formación actual está composta por Flynn, o baixista Jared MacEachern, o batería Matt Alston e o guitarrista Reece Scruggs. O baixista Adam Duce, os guitarristas Logan Mader, Ahrue Luster, Phil Demmel e Wacław Kiełtyka, e os baterías Tony Costanza, Chris Kontos e Dave McClain son antigos membros da banda; Mader e Kontos estiveron de xira con Machine Head en 2019 e 2020 como parte da xira do 25 aniversario do seu primeiro álbum, Burn My Eyes (1994).
Os primeiros catro álbums de Machine Head déronlle á banda unha crecente base de fans en Europa, onde chamaron a atención do programa Headbangers Ball da MTV. Nos Estados Unidos (onde o programa foi retirado durante o movemento grunge) Machine Head non tería éxito ata lanzamentos posteriores. O grupo estivo a piques de separarse en 2002 despois de que fallasen as negociacións co seu selo, Roadrunner Records, no medio da controversia que rodeu ao seu cuarto álbum Supercharger (editado tres semanas despois dos atentados do 11 de setembro de 2001) fixo que o tema "Crashing Around You", que tiña un vídeo no que saían edificios ardendo, fose retirado de todos os medios de comunicación. A banda volveu a asinar con Roadrunner pouco despois.
Despois de experimentar con elementos de groove metal e nu metal nos seus primeiros lanzamentos, Machine Head cambiou a un son thrash metal máis tradicional e cancións máis longas co seu sexto álbum, The Blackening (2007), que recibiu a aclamación da crítica e foi escollido como Álbum da Década por Metal Hammer en 2010;[3] o primeiro sinxelo do álbum, "Aesthetics of Hate", tamén gañou unha nomeación aos premios Grammy.[4] A banda acadou un éxito similar cos seus dous álbums seguintes, Unto the Locust (2011) e Bloodstone & Diamonds (2014).
.jpg?lang=gl)
