Bisa (agiria)

Bisa herrialde batek pertsona bati bere lurraldean sartu edota bertatik irten ahal izateko ematen dion agiri ofiziala da.

Bisa-motak

Hainbat bisa mota daude egin nahi den bidaiaren arabera eskatu beharrekoak:

Igarotze-bisa: atzerriko herrialde batean geldialdi labur bat egiteko eskatzen den aldi baterako baimena, egun bakarrekoa edo bizpahiru egunekoa, beste herrialde batera joan aurretik.
Turista-bisa: helmugako herrialdeak lurraldea turista gisa bisitatu nahi duen pertsonari ematen diona. Bisa honek debekatzen du bisa-emailearen herrialdean negozioak egitea edota bertan lan egitea.
Lanerako bisa: helmugako herrialdeak atzerritar bati bertan lan egin ahal izateko ematen dion baimen-agiria, baldin eta bertako enplegatzaile batekin lan-kontratu bat lortzen badu.
Ikasle-bisa: helmugako herrialdeko ikas-zentro batean izena eman duten pertsonentzako baimena. Ikasteko baino ez du balio.
Kazetari-bisa: kazetari-lanetan dabiltzanek helmugako herrialdean aldi baterako lan egin ahal izateko baimena.
Bisa diplomatikoa: diplomazialari-lanetan dabiltzan pertsonei ematen zaien baimen-agiria helmugako herrialdean diplomazia-lanetan jarduteko, hala nola: bisita ofizialak, enbaxada arloko lanak, eta abar.
Ezkon-bisa: atzerritar batek helmugako herrialdeko herritartasuna duen pertsona batekin ezkondu ahal izateko eskatzen den bisa.
Sarrera-bisa: helmugako herrialdearen migrazio-aduanan aurkeztu behar den agiria da bertan sarrera baimen formala eskatu ahal izateko.
Irteera-bisa: herrialde batzuek euren herritarrei atzerrira joaten uzteko eskatzen dieten agiria da.