Yle Sámi válgaságastallamis bođii maid ovdan fuolla sámelogahaga boahttevuođas, danin go oahppit leat unnán ja gielddas lea hástaleaddji ruhtadilli. Sosiálademokráhtaid evttohas Mika Aikio oaidná márkanastima čoavddusin buoret boahttevuhtii.
- Galggašii áŋgirit márkanastit logahaga ja sámevuođa ávžžuhit, dat lea min fápmu. Galggašii eará guovlluin ja manneba ii Norggas fidnet lasi studeanttaid, ákkastallá Aikio.
RÁB Sámi evttohas Marita Lukkari fas dadjá, ahte oahpaheaddjiid maid ferte geasuhit lasi báikki ala.
- Mii oažžut deike ođđa oahppiid, jus mii fidnet deike lasi oahpaheaddjiid ja dorvvastit sámegiela ja kultuvrra oahpuid, Lukkari dadjá.
Ohcejoga gielda dáistala váttis ruhtadiliin muhto gieldda háliidit dattetge bisuhit iehčanassan. Dássážii gielda lea birgehallan stáhtadoarjaga vehkiin, muhto doarjjasubmit bohtet vátnut. Guovddášbellodaga evttohas Veikko Porsanger deattuha, ahte ruđa ferte fidnet gieldda olggobealde ja Ohcejohkii galgáge geasuhit fitnodagaid.
- Ovdamearkka dihte tontepolitihkain sáhtášeimmet geasuhit deike fitnodagaid ja maiddái márkanastit min gieldda, miihan leat guovddážis Barents-guovllus ja dađe mielde beasašeimmet Jiekŋameara-ovttasbargui mielde, evttoha Porsanger.
RÁB Sámi evttohas Marita Lukkari muittuha, ahte vaikko gielda gal galgá leat ieš aktiivvalaš vai ruhtadilli buorrána, de dan ii oaččo bargat doaimmain, mat bilidit luonddu, degomat ruvkedoaimmain.
- Dat ii bistte go guoktelogi jagi ja dan maŋŋá buot minerálat leat nohkan ja mii čohkkát dáppe sáttorokki siste jurddašeamen, ahte dáppe ii sáhte šat guolástit, doallat bohccuid eatge sáhte šat geasuhit turisttaid báikki ala. Ruvkedoaimmain gal luondu billašuvvá, Lukkari lohká.
Yle Sápmi/ Ailu Valle
