Betula
| Betula | |
|---|---|
 | |
| Denominacions populars | |
albars, abetoches, abetochas / betochas, bitochas, pitochas | |
| Clasificación cientifica | |
| Eukaryota | |
| Plantae | |
| Magnoliophyta | |
| Magnoliopsida | |
| Fagales | |
| Betulaceae | |
| Betula | |
| Descripción | |
Betula L., | |
| Distribución cheografica | |
 | |
Os albars[1] u abetoches[1][2][nota 1] (nombre cientifico Betula) son un chenero d'árbols de fuella caduca en a familia Betulaceae.
Os albars fan fuellas simples, con una forma caracteristicament romboidal, d'entre 3 y 6 cm de lonchitut per alto u baixo 2/3 d'amplo, con variacions per a especie. A crosta ye caracteristicament clara, grisa blanquinyosa. As flors, como en totas as betulacias, i brostan fendo amentos masculins o femenins diferents, anque se troban toz en o mesmo árbol. Estes árbols gosan creixer dica fer d'entre 10 y 30 metros d'altaria.
As especies de Betula se troban per tot l'hemisferio norte, en Europa son omnipresents en os climas minimament humidos (fendo albarosas só que en as zonas de montanya en l'aria mediterrania) anque en Rusia y Escandinavia gosan formar grans extensions selvosas. En Nortamerica y Asia tamién son muit frecuents, pero en o norte d'Africa, per estar tan xuco lo clima suyo, tansament se i troban cualcuns. En os Pireneus espanyols, as albarosas mes grans se troban en Ribagorza y lo Pallars.
Nombre
[editar | modificar o codigo]O nombre latín betūlla u abetūlla pareix que demana d'una radiz celtica betu, que ya gosaba significar "abetocha" en tiempos prerromans. O nombre vernaclo "abetoch" pareix que ye exclusivo d'a Chacetania, documentable seguntes R. Vidaller en as localidaz d'Echo, Chasa y Aragüés de lo Puerto.[2] En a vecina val d'Ansó se i conoix tamién a forma femenina "abetocha",[2] que coexiste con "betocha" y "bitocha"[3]. A forma "albar" que ye como se siente decir en a mes gran parte de puestos per l'Alto Aragón oriental[2] no fa referencia exclusiva a las especies Betula, sino que s'aplica a toz os árbols (encluitos barraceras, alvernices, tremoletas, poplos, etcetera) que manifiestan cualques caracteristicas fisicas en común, como de tener a crosta blanca (en latín, alba) u de creixer en puestos humidos. A forma abetullo[4] tamién ye documentada.
Notas
[editar | modificar o codigo]- ↑ Con as variants femeninas abetocha, betocha, bitocha y pitocha.
Referencias
[editar | modificar o codigo]- 1 2 (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
- 1 2 3 4 (an) VIDALLER TRICAS, Rafael; O Libro d'as Matas y os Animals; Dizionario aragonés d'espezies animals y bechetals; Ed. Bal de Onsera. Zaragoza, 2004. ISBN 978-84-89862-35-7
- ↑ (es) Miguel Ánchel Barcos, El Aragonés Ansotano: estudio lingüístico de Ansó y Fago; Gara d'Edizions. Zaragoza, 2007, p 163.ISBN 978-84-8094-058-0
- ↑ CARRASCO CANTOS, Pilar; Área actual del mantenimiento de las consonantes oclusivas. Archivo de Filología Aragonesa, Nº XLI.
Vinclos externos
[editar | modificar o codigo]
Wikispecies tiene un articlo sobre Betula.
Se veigan as imáchens de Commons sobre os albars.
| Control d'autoridaz |
|
|---|
