27 Apr 2026
കരിമരുന്നിൻ്റെ വിസ്മയമില്ലെങ്കിലും വർണ്ണങ്ങളുടെ വൈവിധ്യം കൊണ്ട് തൃശൂർ പൂരനഗരിയെ ആവേശത്തിലാഴ്ത്തി ലോകപ്രശസ്തമായ കുടമാറ്റം. മുണ്ടത്തിക്കോട് വെടിക്കെട്ട് ദുരന്തത്തിന്റെ പശ്ചാത്തലത്തിൽ ആഘോഷങ്ങളിൽ നിയന്ത്രണം ഏർപ്പെടുത്തിയിരുന്നെങ്കിലും, പാറമേക്കാവ് - തിരുവമ്പാടി ദേവസ്വങ്ങൾ മത്സരിച്ചാടിയ കുടമാറ്റം കാണാൻ പതിനായിരങ്ങളാണ് തേക്കിൻകാട് മൈതാനിയിലേക്ക് ഒഴുകിയെത്തിയത്. വൈകുന്നേരം അഞ്ചരയോടെ തെക്കേ ഗോപുരവാതിൽ തുറന്ന് പാറമേക്കാവ് ഭഗവതി പുറത്തേക്ക് എഴുന്നള്ളിയതോടെയാണ് കുടമാറ്റത്തിന് തുടക്കമായത്.
