لالو کے خلاف ایف آئی آر
ہندوستان میں ریلوے کے وزير لالو پرساد یادو کے خلاف ورون گاندھی کے بارے میں اشتعال انگيز تقریر کرنے کے الزام میں ایف آئی آر درج کر لی گئی ہے۔
ریاست بہار کے کشن گنج ضلع کے ایک پولیس اہلکار نے بی بی سی کو بتایا کہ لالو پرساد کے خلاف اشتعال انگیز تقریر کرنے پر ایف آئی آر درج کی گئی ہے ۔
انہوں نے یہ بھی بتایا ہے کہ اس کی اطلاع انتخابی کمیشن کو بھی دے دی گئی ہے۔
لالو پرساد یادو نے پیلی بھیت انتخابی حلقے سے بھارتیہ جنتا پارٹی کے امیدوار ورون گاندھی کے بارے ميں کہا تھا کہ اگر وہ وزیر داخلہ ہوتے تو ورون کی چھاتی پر رولر چلاوا دیتے چاہے نتیجہ جو بھی ہوتا۔
ورون گاندھی مسلمانوں کے خلاف اشتعال انگیز تقریر کرنے کے الزام میں اتر پردیش کی ایٹا جیل میں قید ہیں۔
بعد میں لالو پرساد یادو نے کہا کہ ان کے بیان کا غلط مطلب نکالا گیا ہے اور انہوں نے سیاسی رولر چلانے کی بات کی تھی۔
اس معاملے پر بہار کے وزير اعٰلی نتیش کمار نے کہا کہ ’اس قسم کی اشتعال انگیزی سماجی اور فرقہ وارانہ خلیج پیدا کرتی ہے۔‘
انہوں نے لالو پرساد کے خلاف سخت کارروائی کا مطالبہ بھی کیا ہے۔
End of سب سے زیادہ پڑھی جانے والی
ادھر ورون گاندھی کی والدہ مانیکہ گاندھی اپنے بیٹے سے ملاقات کرنے ایٹا جیل گئیں اور آج ہی رام جنم بھومی نیاس کے صدر اور سابق رکن پارلیمان رام ولاس ویدانتی بھی ورون گاندھی سے ملاقات کرنے گئے۔
ملاقات کے بعد ویدانتی نے صحافیوں سے گفتگو میں کہا کہ اگر وہ ریلوے کے وزير ہوتے تو ورون کے خلاف دیے گئے بیانات کے جواب ميں لالو پرساد یادو پر ریل چلوا دیتے۔
