بلوچ رہنماؤں کا چہلم، شٹر ڈاؤن ہڑتال

تین بلوچ قوم پرست رہنماؤں کا چہلم جمعہ کے روز پورے بلوچستان میں منایا جا رہا ہے اور اس موقع پر پورے مکران ڈویژن میں گوادر اور تربت سمیت دیگر شہروں میں مکمل شٹر ڈاؤن ہڑتال رہی۔

یاد رہے کہ غلام محمد بلوچ ،شیرمحمد بلوچ اور لالہ منیر کی مسخ شدہ لاشیں گذشتہ ماہ آٹھ اپریل کو تربت کے علاقے پداگ سے ملی تھیں۔بلوچ قوم پرستوں نے ہلاکتوں کی ذمہ داری پاکستان کے خفیہ اداروں پر عائد کی ہے تاہم حکومت اس کی تردیدکرچکی ہے۔

بلوچستان کے تین قوم پرست رہنماؤں کے ایصال ثواب کے لیے مختلف مقامات پر فاتحہ خوانی کی گئی۔

دوسری جانب بلوچستان نیشنل موومنٹ کے سربراہ غلام محمد بلوچ کے آبائی شہر مند میں جمعہ کی شام کوایک بڑے احتجاجی جلسہ کا اہتمام کیاگیا ہے جس میں شرکت کے لیے کراچی، کوئٹہ اور خضدار سے قافلے مند پہنچ چکے ہیں۔ جلسے سے بلوچ نیشنل موومنٹ، بلوچ نیشنل فرنٹ، بلوچ ری پبلیکن پارٹی، بلوچ رائٹس اور بی ایس او آزاد کے قائدین خطاب کرینگے۔

واضح رہے کہ قتل ہونے والے تین بلوچ رہنماوں کو گذشتہ ماہ تین اپریل کوتربت میں نیشنل پارٹی کے رہنماء اور بلوچستان اسمبلی میں سابق لیڈر حزب اختلاف کچلول علی ایڈووکیٹ کے دفترسے اس وقت نامعلوم مسلح نے اغواء کیا تھا جب یہ تینوں رہنماء انسداد دہشت گردی کی ایک عدالت میں پیش ہونے کے بعد کیس کے بارے میں صلاح ومشورہ کرنے کے لیے کچکول علی ایڈووکیٹ کے دفتر میں تھے۔