چیمبرز ریلے ٹیم سے باہر
یورپی انڈور ایتھلیٹکس چیمپئن شپ میں ساٹھ میٹر کی دوڑ میں گولڈ میڈل جیتنے کے باوجود برطانوی ایتھلیٹ ڈوین چیمبرز کو چار ضرب سو میٹر ریلے ریس کے لیے برطانوی ٹیم میں شامل نہیں کیا گیا ہے۔
برطانوی ایتھلیٹکس کے سربراہ چارلس وین کمینی کے مطابق چیمبرز اگست میں برلن میں ہونے والے عالمی مقابلوں میں شرکت نہیں کریں گے۔
چارلس کمینی کے مطابق ' چیمبرز 2012 اولمپک کھیلوں میں شرکت کے اہل نہیں ہیں اور یہی ہمارے فیصلے کی وجہ بنی ہے‘۔تیس سالہ چیمبرز پر 2003 میں قوت بخش ادویات کے استعمال کا الزام ثابت ہونے پر ان کی اولمپکس میں شرکت پر تاحیات پابندی لگا دی گئی تھی۔
چارلس نے اس بات سے انکار کیا کہ اس فیصلے کے پیچھے چیمبرز کی سوانح عمری کا عمل دخل ہے۔ چیمبرز نے اپنی سوانح عمری میں کھیلوں سے تعلق رکھنے والی برطانوی شخصیات پر کڑی تنقید کی ہے۔
خیال رہے کہ چیمبرز نے اتوار کو یورپی انڈور ایتھلیٹکس چیمپئن شپ میں ساٹھ میٹر کی دوڑ میں طلائی تمغہ جیتا تھا۔ انہوں نے یہ وقت چھ اعشاریہ چار چھ سیکنڈ میں طے کیا تھا۔ اس سے قبل سیمی فائنل مقابلے میں انہوں نے نیا یورپی اور برطانوی ریکارڈ قائم کیا تھا اور یہی فاصلہ چھ اعشاریہ چار دو سیکنڈ میں طے کرتے ہوئے جیسن گارڈنر کا دس برس پرانا ریکارڈ توڑ دیا تھا۔
